မွန်  ၊ အင်္ဂလိပ် ၊  Font

Breaking News
Home / သတင်း / ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ မွန်ပြည်နယ်တွင် ဖွဲ့စည်းပြီ

ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ မွန်ပြည်နယ်တွင် ဖွဲ့စည်းပြီ

ရေးသားသူ: >

မွန်ပြည်နယ်တွင် ငြိမ်းချမ်းရေးလက်မှတ်ထိုးထားသည့် လက်နက်ကိုင်အဖွဲ့များအား စောင့်ကြည့်ရန်အတွက် ဇွန်လ ၃၀ ရက်နေ့တွင် မွန်ပြည်နယ်၊ မော်မြိုင်မြို့၊ အရှေ့တောင်တိုင်းစစ်ဌာနချုပ်၊ အောင်ဆန်းခန်းမ၌ အပစ်ခတ်ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-S ဖွဲ့စည်းခဲ့ပြီဖြစ်ကြောင်း သိရသည်။

မွန်ပြည်နယ် JMC-S ဖွဲ့စည်းခြင်းအခမ်းအနား(MNA)
မွန်ပြည်နယ် JMC-S ဖွဲ့စည်းခြင်းအခမ်းအနား(MNA)

အဆိုပါ ပြည်နယ်အဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီတွင် အစိုးရနှင့် တိုင်းရင်းသား လက်နက်ကိုင်အဖွဲ့များမှ ကိုယ်စားလှယ် ၅ ဦးစီဖြင့် ပါဝင်ပြီး နှစ်ဘက်မှ အဆိုပြုသော အများယုံကြည်လေစားသည့် အရပ်သား ကိုယ်စားလှယ် ၂ ဦးစီပါဝင်၍ စုစုပေါင်း ၁၄ ဦးဖြင့်ဖွဲ့စည်းထားပြီး ဥက္ကဌအဖြစ် အရှေ့တောင်တိုင်းစစ်ဌာနချုပ် တိုင်းမှူးဗိုလ်မှူးချုပ် မျိုးဝင်း၊ ဒုဥက္ကဌ (၁) အဖြစ် KNLA ဗိုလ်မှူးကြီး စောပလေ့ (KNU)၊ ဒုဥက္ကဌ (၂) အဖြစ် ပြည်နယ်ဝန်ကြီးဟောင်း ဒေါက်တာမင်းနွယ်စိုးတို့ ပါဝင်သည်ကို တွေ့ရသည်။

မွန်ပြည်နယ် JMC-S ဒုဥက္ကဌ (၂) ဒေါက်တာ မင်းနွယ်စိုးက “အဓိက ကတော့ NCA မှာလက်မှတ်ထိုးထားတဲ့ အဖွဲ့တွေကို စောင့်ကြည့်ရမှာပါ။ NCA စာချုပ် မှာ ပါတဲ့အတိုင်းလုပ်ဆောင်ရမယ်။ အပစ်ခတ်ရပ်စဲထားတဲ့ လုပ်ငန်းတွေ ဘယ်လိုရှိလဲ၊ နှစ်ဖက်တပ် ဘယ်လိုလှုပ်ရှားမှုတွေရှိလဲ၊ စာချုပ်ပါအတိုင်းလိုက်နာမှုရှိ/မရှိ ဒါတွေကို စောင့်ကြည့်ရမယ်” ဟု ဆိုသည်။

ပြဿနာတစုံတရာပေါ်ပေါက်လာပါက နှစ်ဖက်တပ်မှူးများကို ခေါ်ယူဆွေးနွေးရမည်ဖြစ်ကြောင်း၊ ယင်းသို့ ခေါ်ယူဆွေး နွေးရာတွင် အမိန့်ပေးခြင်း/ အဓမ္မခေါ်ယူခြင်း မရှိစေရန်နှင့် ညှိနှိုင်ဖြေရှင်းသည့် ပုံစံသာ ပြုလုပ်ရမည်ဖြစ်ကြောင်း ဒေါက်တာမင်းနွယ်စိုးက ဆက်ပြောသည်။

“ကျွန်တော်တို့နိ်ုင်ငံမှာ တိုက်ပွဲတွေဟာ နေရာတိုင်မှာရှိနေပါတယ်။ ကျွန်တော်တို့ နိုင်ငံယဉ်ကျေးမှုသစ် တရပ်အနေနဲ့ နိုင်ငံရေးပြသနာတွေကို နိုင်ငံရေးနည်းနဲ့ဖြေရှင်းမယ်။ လက်နက်ကိုင်နည်းနဲ့ မဖြေရှင်းချင်ဘူး” ဟု ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-U ဒုဥက္ကဌ (၁) ဗိုလ်ချုပ် စောအိုင်းဇက်ဖိုး က ဆိုသည်။

နိုင်ငံရေးဆွေးနွေးပွဲတွေမှာ လက်နက်ကိုင်အဖွဲ့အစည်းအားလုံးပါဝင်လာနိုင်အာင်ဆွေးနွေးသွားမှာ ဖြစ်သလို နိုင်ငံရေးလိုအပ်ချက်ကို နိုင်ငံရေးစာပွဲဝိုင်းပေါ်တွင် ဆွေးနွေးသွားမည်ဖြစ်ကြောင်း၊ JMC ၏ အဓိက တာဝန်ဖြစ်သည့် နိုင်ငံရေးဆွေးနွေးပွဲ ကျင်းပခြင်းများ၊ ပူတွဲစောင့်ကြည့်သည့်အခါ တိုက်ပွဲမဖြစ်ပွားအောင် ထိန်သိမ်းလုပ်ဆောင်သွားမည်ဖြစ်ပြီ ပစ်ခတ်ရပ်စဲရေးကို ခိုင်မာအောင် ဆက်လက်လုပ်ဆောင်သွားမည်ဖြစ်ကြောင်း ဒုဥက္ကဌ (၁) ဗိုလ်ချုပ် စောအိုင်းဇက်ဖိုး က ဆက်ပြောသည်။

အစိုးရအဖွဲ့မှ ကိုယ်စားလှယ်များ၊ တိုင်းရင်းသားလက်ကိုင်အဖွဲ့မှ ကိုယ်စားလှယ်များနှင့် အရပ်သားကိုယ်စား လှယ်များဖြင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ သုံးပွင့်ဆိုင် ဖွဲ့စည့်ထား သည်ဟု ကော်မတီဝင်များမှ သိရသည်။

ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ ဖွဲ့စည်းရာတွင် အစိုးရနှင့် တိုင်ရင်းသားလက်နက်ကိုင်များဘက်မှ ကိုယ်စားလှယ် ၁၀ ဦးစီဖြင့်လည်းကောင်း၊ နှစ်ဖက်မှ အဆိုပြုသော အများယုံကြည်လေးစားသည့် အရပ်သားကိုယ်စားလှယ် ၃ ဦးစီဖြင့် လည်းကောင်း စုစုပေါင်း ၂၆ ဦးဖြင့် ဖွဲ့စည်းထားသည်။

ပြည်ထောင်စု ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-U ဒုတိယဥက္ကဌ (၂) ဦးကိုကိုကြီးက “လက်မှတ်ရေးထိုးပြီးနောက်ပိုင်းမှာ ပစ်ခတ်တိုက်ခိုက်မှု သဘောတူညီချက် ခိုင်မာအောင် ပြုလုပ်ဖို့အတွက် စောင့်ကြည့်တဲ့လုပ်ငန်းစဉ် ကျွန်တော်တို့လိုအပ်လာတယ်။ အဲဒီတော့ ပြည်ထောင်စုအဆင့်မှာ ဖွဲ့သလို တိုင်းဒေသကြီး/ပြည်နယ်အဆင့် နောက်တခါ ဒေသဆိုင်ရာအဆင့်ထိ သုံးဆင့် ဖွဲ့ပါတယ်” ဟု ဆိုသည်။

တိုင်းဒေသကြီး/ပြည်နယ်အဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီကို ဇန်နဝါရီ ၉ ရက်က ရှမ်းပြည်နယ်၌ ဖွင့်လှစ်ခဲ့ပြီ ဖေဖော်ဝါရီ ၂၅ ရက်တွင် တနင်္သာရီတိုင်းနှင့် ဇွန် ၂၉ ရက်နေ့တွင် ကရင်ပြည်နယ်တို့တွင် ဖွဲ့စည်းခဲ့ပြီးကြောင်း သိရသည်။

မွန်ပြည်နယ် JMC-S အဖွဲ့ဝင်များအဖြစ် ဗိုလ်မှူးကြီးဝင်းနိုင်ဦး(အစိုးရကိုယ်စားလှယ်)၊ ဦးဇော်လင်းထွန်း(အစိုးရကိုယ်စားလှယ်)၊ ရဲမှူးကြီးဘိုဘိုဦး(အစိုးရကိုယ်စားလှယ်)၊ ဗဒိုစောစိုးမြင့် (KNU တပ်မဟာ ၁)၊ ဗိုလ်မှူးကြီး စောဂျိုးစွာ(KNU တပ်မဟာ ၆)၊ ဗိုလ်မှူး စောဆဲနေထူး(KNU တပ်မဟာ ၆)၊ စောဟိုရှေး(အရပ်သားကိုယ်စားလှယ်)၊ နော်ဆာထူး(အရပ်သားကိုယ်စားလှယ်)၊ ၊ ဒေါက်တာမိယဉ်ချမ်း(အရပ်သားကိုယ်စားလှယ်)၊ အတွင်းရေးမှူး(၁) အဖြစ် ဗိုလ်ကြီးစောကျော်မြင့် (KNU တပ်မဟာ ၁)၊ အတွင်းရေးမှူး(၂) အဖြစ် ဒုတိယဗိုလ်မှူးကြီးရဲထွဋ် (အစိုးရကိုယ်စားလှယ်) တို့ပါဝင်သည်။

About မွန်သတင်းအေဂျင်စီ

Check Also

စစ်မှန်သောနိုင်ငံရေးတည်ဆောက်ရန် အားလုံးပါဝင်ရေး ဗိုလ်ချုပ်ကြီးစောမူတူးစေးဖိုး ပြောကြား

စစ်မှန်သော နိုင်ငံရေးတည်ဆောက်ရန်အတွက် အားလုံးပါဝင်ကြရန် ငြိမ်းချမ်းရေးလုပ်ငန်းစဉ် ဦးဆောင်အဖွဲ့ Peace Process Steering Team-PPST ခေါင်းဆောင် ကရင်အမျိုးသားအစည်းအရုံး KNU ဥက္ကဋ္ဌ ဗိုလ်ချုပ်ကြီး စောမူတူးစေးဖိုး …

Leave a Reply

%d bloggers like this: