မွန်  ၊ အင်္ဂလိပ် ၊  Font

Breaking News
Home / သတင်း / မွန်အထကကျောင်းများတွင် ဝါရင့်ဆရာများခန့်အပ်ရန်အခက်အခဲရှိနေ

မွန်အထကကျောင်းများတွင် ဝါရင့်ဆရာများခန့်အပ်ရန်အခက်အခဲရှိနေ

ရေးသားသူ: >

မွန်အမျိုးသားပညာရေးဌာန လက်အောက်ခံရှိ မွန်အမျိုးသားအထက်တန်းကျောင်းများတွင် ဝါရင့်ဆရာ/ဆရာမများ ခန့်အပ်ရန် ရန်ပုံငွေအခက်အခဲရှိနေခြင်းကြောင့် တက္ကသိုလ်ဝင်တန်းအောင်ချက် ကျဆင်းနေကြောင်း မွန်အမျိုးသားပညာရေးဌာန တာဝန်ခံက မွန်သတင်းအေဂျင်စီသို့ ပြောသည်။

အံဒင် မွန်အမျိုးသားအထက(Nai Eye Mon Facebook)
အံဒင် မွန်အမျိုးသားအထက(Nai Eye Mon Facebook)

မွန်အမျိုးသား ပညာရေးဌာန တာဝန်ခံ မိစားတားက “တက္ကသိုလ်ဝင်တန်း အောင်ချက်ကောင်းလာဖို့အတွက် မွန်အမျိုးသားပညာရေးဌာနအနေနဲ့ အတွေ့အကြုံရှိတဲ့ ဆရာ/ ဆရာမ ခန့်အပ်ရန် အစီအစဉ်ရှိပါတယ်၊ ဒါပေမယ့် ထောက်ပံ့ကြေး များများမပေးနိုင်တဲ့အခါကျတော့ ဝါရင့် ဆရာ/ ဆရာမများ လာရောက်ပြီး သင်ကြားပေးဖို့ အခက်ခဲရှိနေပါတယ်” ဟု ပြောသည်။

မွန်အမျိုးသားအထက်တန်းကျောင်းတွင် တက္ကသိုလ်ဝင်တန်း သင်ကြားပေးသည့် မွန် ဆရာ/ ဆရာမများကလည်း အတွေ့အကြုံနုခြင်းကြောင့် သင်ကြားမှုတွင်အခက်အခဲရှိနေကြောင်း ၄င်းကဆက်ပြောသည်။

တက္ကသိုလ်ဝင်တန်း အောင်ချက် ပြန်လည်ကောင်းမွန်လာစေရန် မွန်အမျိုးသားပညာရေးဌာန အနေဖြင့် မွန်အမျိုးသားအထက်တန်းကျောင်း ၃ ကျောင်းရှိ မွန်ဆရာ/ ဆရာမများကို တက္ကသိုလ်ဆရာများ၊ ကျုရှင်ဆရာများနှင့် ၃ လ တစ်ကြိမ် တွေ့ဆုံပြီး သင်ကြားနည်းများ ပို့ချပေးရန် ညှိနှိုင်းဆွေးနွေးမှုများ ဆက်လက်ဆောင်ရွက်သွားမည်ဖြစ်ကြောင်း သိရသည်။

မွန်အမျိုးသားပညာရေးဌာန စီမံအုပ်ချုပ်သူ မင်းအောင်ဇေက “ ကိုယ့်ဆရာနဲ့ကိုယ်ဆိုတော့ တစ်လကို ထောက်ပံ့ကြေး ၁ သိန်းခွဲပဲရပါတယ်၊ ဒီလောက်ထောက်ပံ့ကြေးနဲ့ဆို မြို့ပေါ်က ကျော်ကြားတဲ့ဆရာတွေမလာနိုင်ဘူးလေ၊ အနိမ့်ဆုံး ထောက်ပံ့ကြေး ၃ သိန်းပေးရင်တောင် သာမာန်ဆရာပဲရမယ်ဆိုတော့ ထောက်ပံ့ပေးဖို့က အခက်အခဲရှိတာပေါ့နော်၊ ကလေးတွေကို မြို့ပေါ်မှာမထားနိုင်တာလည်း ပါတယ်၊ စီမံအုပ်ချုပ်ရေးအပိုင်းတွေလည်း လိုတာပေါ့”ဟု ပြောသည်။

မွန်အမျိုးသားပညာရေးကျောင်းတွင် တက္ကသိုလ်ဝင်တန်းအောင်ချက် ဆက်လက်ကျဆင်းနေကြောင်း၊ ငွေကြေးတတ်နိုင်သည့် ကျောင်းသားမိဘများကလည်း သားသမီးများကို သီးသန့်ဘော်ဒါဆောင်များတွင် ထားရှိကြောင်း၊ မိဘထောက်ပံ့ငွေကြေးမပေးနိုင်သည့် ကျောင်းသားများအား အတွေ့အကြုံနုနယ်သည့်ဆရာများနှင့် သင်ကြားနေရသည့်အတွက် အောင်ချက်ကျနေကြောင်း ၄င်းက ဆက်ပြောသည်။

မွန်အမျိုးသားပညာရေးဌာန လက်အောက်ခံရှိ မွန်အမျိုးသားအထက်တန်းကျောင်း ၃ ကျောင်းမှ ၂၀၁၆ ခုနှစ် အစိုးရတက္ကသိုလ်ဝင်တန်းစာမေးပွဲ ဝင်ရောက်ဖြေဆိုသူ ၉၃ ဦး အောင်ချက် ၁၁.၈၃ ရာနှုန်းသာရှိကြောင်း သိရသည်။

မွန်အမျိုးသားပညာရေးကျောင်းတွင် တက္ကသိုလ်ဝင်တန်း အောင်ချက်ကျဆင်းနေမှုနှင့် ပတ်သက်ပြီး ပညာရေးဌာနမူဝါဒ အသစ် ပြန်လည်ရေးဆွဲသွားမည်ဖြစ်ကြောင်း၊ အဆိုပါ မူဝါဒအသစ်ရေးဆွဲရာတွင် ပညာရေးစီမံအုပ်ချုပ်သူများ ဦးဆောင်ပြီး ဆရာ/ ဆရာမများ၊ ကျောင်းသားမိဘများ ပူးပေါင်းဆောင်ရွက်သွားလျှင် အောင်ချက် ပြန်လည်ကောင်းမွန်လာမည်ဖြစ်ကြောင်း မင်းအောင်ဇေက ဆက်ပြောသည်။

မွန်အမျိုးသားပညာရေးဌာနတွင် Post-ten ဆယ်တန်းလွန်ကျောင်း တစ်ကျောင်း၊ အထက်တန်းကျောင်း ၃ ကျောင်း၊ အလယ်တန်းကျောင်း ၁၆ ကျောင်း၊ မူလွန်ကျောင်း ၂၉ ကျောင်း နှင့် မူလတန်းကျောင်း ၈၉ ကျောင်း စုစုပေါင်း ၁၃၈ ကျောင်း ရှိကြောင်း သိရသည်။

About မွန်သတင်းအေဂျင်စီ

Check Also

မြို့ဝင်ကြေးကောက်ခံခြင်း ဖျက်သိမ်းပေးရန်တောင်းဆိုမှုရှိ

မွန်ပြည်နယ်အတွင်း (၁၀) မြို့နယ်စလုံးတွင် ဒေသဖွံ့ဖြိုးရေးဆိုသည့် မော်တော်ယာဉ်များအပေါ် မြို့ဝင်ကြေးကောက်ခံနေခြင်းသည် စားဝတ်နေရေး မပြေလည်သည့် ပြည်သူလူထု၏ စီးပွားရေးကို ပိုမိုဆိုးရွားစွာ ထိခိုက်စေသည့်အတွက် ဖျက်သိမ်းပေးရန် တောင်းဆိုနေကြသည်။ Related

Leave a Reply

%d bloggers like this: