မွန်  ၊ အင်္ဂလိပ် ၊  Font

Breaking News
Home / သတင်း / MCL ဘိလပ်မြေစက်ရုံစောင့်ကြည့်ရေး ဖွဲ့စည်းမည်

MCL ဘိလပ်မြေစက်ရုံစောင့်ကြည့်ရေး ဖွဲ့စည်းမည်

ရေးသားသူ: >
ကျောက်မီးသွေးစက်ရုံ(GS)
ကျောက်မီးသွေးစက်ရုံ(GS)
MCL ဘိလပ်မြေစက်ရုံအနီးတဝိုက်ရှိ ဒေသခံများအတွက် ဆိုးကျိုးများမည်သို့ ကျရောက်နိုင်သည်ကို လေ့လာစောင့်ကြည့်ရေးအဖွဲ့ ဖွဲ့စည်းမည်ဟု ကျိုက်မရောမြို့နယ် ဒေသခံများထံမှ သတင်းရရှိသည်။

အဆိုပါ ဘိလပ်မြေစက်ရုံ၏ လုပ်ငန်းနှင့်ပတ်သက်သည့်ကိစ္စရပ်များကို ဒေသခံများနားလည် သဘောပေါက်စေရန် သက်ဆိုင်ရာကုမ္ပဏီအနေဖြင့် ရှင်းပြခဲ့ခြင်း မရှိကြောင်း၊ စက်ရုံနှင့် ပတ်ဝန်းကျင်အနီးတဝိုက်တွင် ဒေသခံနှင့် အရပ်ဖက်လူမှုအဖွဲ့အစည်းများ လေ့လာလိုသော်လည်း ကုမ္ပဏီက လေ့လာခွင့်မပြုကြောင်း သိရသည်။

“ကျနော်တို့ ကြားသိသလောက်တော့ စက်ရုံဝင်းထဲမှာ မူးယစ်ဆေးဝါးရောင်းဝယ်မှုကိစ္စတွေ၊ အလုပ်သမားတွေ လုပ်အားခဖြတ်တောက်ခံရတာတွေ၊ တရားမဝင်း ခိုးဝင်လာသူတွေ၊ ကျောက်မီးသွေး စွမ်းအင် သုံးစွဲမယ်ဆိုတဲ့ သတင်းတွေကို အမှန်သိအောင် လေ့လာခွင့် မရခဲ့ပါ။ ဒါကြောင့် ဒေသခံ လူထု အကျိုးကို ကာကွယ်စောင့်ရှောက်ဖို့အတွက် စောင့်ကြည့်ရေးအဖွဲ့ ဖွဲ့စည်းသင့်တယ်” ဟု MATA ဗဟိုဦးဆောင်ကော်မတီ မင်းအောင်ထူးက ဆိုသည်။

ဘိလပ်မြေစက်ရုံ စတင်အကောင်အထည်ဖေါ်စဉ်က စက်ရုံလည်ပတ်နိုင်မည့် လျှပ်စစ်စွမ်းအင်ကို မည်ကဲ့သို့ထုတ်ယူသုံးစွဲမည်ကို ဒေသခံများ မသိရှိခဲ့ကြသော်လည်း ယခုအခါ ကျောက်မီးသွေး စွမ်းအင်နှင့် မောင်းနှင်မည့်သတင်းထွက်ပေါ်လာသဖြင့် ဒေသခံများ စိုးရိမ်မှုများ ဖြစ်ပေါ်လာသည်ဟု သိရသည်။

“ကျနော်တို့နားလည်ထားတာက ဒီစက်ရုံကို ကျနော်တို့ဒေသမှာ လာဆောက်မယ်ဆိုရင် ဒေသခံတွေ အလုပ်ရမယ်၊ ကျနော်တို့ဒေသ ဖွံ့ဖြိုးလာမယ် ဒါလောက်ဘဲ သိထားတာ။ အခု စက်ရုံကို ကျောက်မီးသွေး စွမ်းအင်နဲ့ သူတို့မောင်းနှင်မယ်ဆိုတာ သိရတော့ အဲဒီက ထွက်တဲ့ ဘေးအန္တရာယ်ရှိတဲ့ စွန့်လွှတ်ပစ္စည်းတွေကို သူတို့ဘယ်မှာ စွန့်ပစ်မလဲ၊ မြစ် ချောင်းထဲမှာ စွန့်ပစ်ရင်တော့ ဒေသခံများသာမက ဒီမြစ်ရေ ချောင်းရေကို သုံးစွဲနေကြတဲ့ မြစ်အောက်ဖက်နေ လူထုတွေလည်း ဘေးဖြစ်နိုင်တယ်ဆိုတော့ စိုးရိမ်စရာပေါ့” ဟု ကျိုက်မရောမြို့နယ် ဒေသခံ တစ်ဦးက ဆိုသည်။
စက်ရုံစတင်တည်ဆောက်စဉ် မြေယာရောင်းဝယ်ရေးပြဿနာများ ရှိခဲ့သော်လည်း စက်ရုံကုမ္ပဏီမှ ဖြေရှင်းပေးသဖြင့် အထိုက်အလျောက်ပြေလည်မှုရှိသော်လည်း ယခုအခါ ကျောက်မီးသွေး စွမ်းအင်ထုတ် စက်ရုံကိစ္စကို မည်သို့ကိုင်တွယ်ဖြေရှင်းကြမည်ကို ဒေသခံများ စိတ်ဝင်စားနေကြသည်ဟု သိရသည်။

“ ကျောက်မီးသွေးစက်ရုံကိစ္စ ဆွေးနွေးစဉ်တုန်းက ကျနော်လည်း တက်ရောက်ခဲ့တယ်။ စက်ရုံကနေ ထွက်တဲ့ မီးခိုးငွေ့ မီးအမှုန်တွေကို ကောင်းကင်ဘက်ကို မထုတ်ဘဲ၊ မြေအောက်ဖက်ကို မှုတ်ထုတ်မယ်လို့ ဆိုတယ်။ ဒါကြောင့် ဘေးဥပါဒ် မဖြစ်ဘူးလို့ သူတို့(ကုမ္ပဏီ)က ရှင်းပြခဲ့တယ်”ဟု အမည်မဖေါ်လိုသော မယ်ကရိုကျေးရွာသား တစ်ဦးက မွန်သတင်းအေဂျင်စီသို့ ပြောသည်။

၎င်းမော်လမြိုင်ဘိလပ်မြေစက်ရုံကို ထိုင်းဘတ် (၁၂,၄၀ဝ) သန်း ရင်းနှီးမြုပ်နှံကာ တစ်နေ့လျှင် ဘိလပ်မြေ တန်ချိန် (၅၀ဝ၀) ခန့် ထုပ်လုပ်မည်ဟု ဆိုသည်။

ဘိလပ်မြေစက်ရုံ တည်ဆောက်မှုကို ၂၀၁၄၊ ဇန်နဝါရီလက အကောင်အထည်ဖေါ်ခဲ့ပြီး ၂၀၁၆ မတ်လခန့်တွင် စက်ရုံလည်ပတ်နိုင်မည်ဟု စက်ရုံတည်ဆောက်ရေးကုမ္ပဏီမှ ထုတ်ဖေါ် ပြောဆိုထားသည်။

About မွန်သတင်းအေဂျင်စီ

Check Also

တာဝန်ရပ်လိုက်သည့်ရေးမြို့နယ်ကျေးရွာအုပ်ချုပ်ရေးမှူး (၄) ဦးနေရာ အသစ်ပြန်ရွေးမည်

ပြီးခဲ့သည့် အောက်တိုဘာလကုန်တွင် တာဝန်မှရပ်စဲလိုက်သည့် ရေးမြို့နယ်မှ ကျေးရွာအုပ်ချုပ်ရေးမှူး (၄) ဦး နေရာတွင် အုပ်ချုပ်ရေးမှူးအသစ်ကို တစ်လအတွင်း ပြန်လည်ရွေးချယ်သွားမည်ဟု ရေးမြို့နယ်၊ အထွေထွေ အုပ်ချုပ်ရေးမှူးမှ သိရသည်။ …

Leave a Reply

%d bloggers like this: