spot_img
Friday, March 29, 2024
More
    spot_img
    Homeအယ်ဒီတာ့အာဘော်မွန်အမတ်လောင်းတွေ ခွက်ခွက်လန်မဲရှုံးတဲ့ပွဲ

    မွန်အမတ်လောင်းတွေ ခွက်ခွက်လန်မဲရှုံးတဲ့ပွဲ

    -

    မွန်ပြည်နယ် အနိုင်ရကိုယ်စားလှယ်များ(Facebook)
    မွန်ပြည်နယ် အနိုင်ရကိုယ်စားလှယ်များ(Facebook)
    ၂၀၁၅ ရွေးကောက်ပွဲတွင် မွန်အမျိုးသားပါတီ၊ မွန်ဒေသလုံးဆိုင်ရာဒီမိုကရေစီပါတီ၊ အမျိုးသမီး(မွန်)ပါတီအပြင် ၄င်းပါတီများမှ ပဲ့ကွဲထွက်လာသော တစ်သီးပုဂ္ဂလများ စုစုပေါင်းမွန်ကိုယ်စားလှယ်လောင်းအားလုံး ၁၀၀ နီးပါးခန့် ၂၀၁၅ ရွေးကောက်ပွဲဝင်ပြိုင်ခဲ့ရာတွင် ၄ ဦးသာအနိုင်ရရှိသဖြင့် မွန်အမတ်လောင်းတွေ ခွက်ခွက်လန်ရှုံးတဲ့ပွဲဟု

    ပြောဆိုစမှတ်ပြုစရာ ဖြစ်ပေတော့သည်။

    မဲရှုံးရသည့်အကြောင်းအရင်းအမျိုးမျိုးရှိသည်ဟု ဆင်ခြေပြပြောဆိုစရာရှိသော်ငြား အဆိုပါကိုယ်စားလှယ်လောင်းများအတွက် လုံလောက်သောထောက်ခံမဲအရေအတွက် မရရှိခဲ့သည်က အမှန်ကန်ဆုံးအဖြေ မဟုတ်ပေလော။

    မွန်ပြည်နယ်၌ မွန်၊ ဗမာ၊ ကရင်၊ ပအိုဝ်နှင့် အခြားတိုင်းရင်းသားများ နေထိုင်ကြရာတွင် မွန်တိုင်းရင်းသားဦးရေအများဆုံးဖြစ်သော်လည်း မွန်ကိုယ်စားလှယ်လောင်းများအတွက် လုံလောက်သောမဲအရေအတွက် မရရှိသည့်အရင်းခံမှာ မွန်ပါတီကြီး ၂ ခုဖြစ်နေသောကြောင့်ဟု ထောက်ပြစရာ အခိုင်အလုံရှိနေပါသည်။

    ရွေးကောက်ပွဲမဲစာရင်းရလာဒ်များ၊ စောင့်ကြည့်လေ့လာသူများ၊ မဲဆန္ဒရှင်များ၏ ပြောကြားချက်အရ မွန်ကိုယ်စားလှယ်လောင်းများအား မဲပေးရာတွင် ဇဝေဇဝါဖြစ်နေရခြင်း၊ တစ်ဖက်ပါတီကို မဲပေးလျင်ဘက်လိုက်ရာရောက်ခြင်း၊ မွန်ပါတီများအား မဲပေးလိုသောစိတ်ဆန္ဒမရှိခြင်းနှင့် မွန် ၂ ပါတီအပြိုင်အဆိုင်ဖြစ်နေသည့်အတွက် မွန်ကိုယ်စားလှယ်လောင်းများကို မဲကျရှုံးစေခြင်းပင် ဖြစ်သည်။

    ရွေးကောက်ပွဲဝင် မွန်တစ်ပါတီဖြစ်ရေး အကြိမ်ကြိမ်ကြိုးစားခဲ့သော မွန်သံဃာတော်များ၊ ညီညွတ်ရေးလိုလားသူများနှင့် M23 မွန်အမတ်လောင်းများမဲအောင်နိုင်ရေးအဖွဲ့တို့သည် မွန် ၂ ပါတီဖြစ်နေပါက ရွေးကောက်ပွဲတွင်မဲကွဲသဖြင့် ရှုံးနိမ့်မည့်အနေအထားကိုလည်း ကြိုတင်နိမိတ်ဖတ်ထားပေးပြီး ဖြစ်သည်။

    သို့သော် မွန် ၂ ပါတီခေါင်းဆောင်များအနေဖြင့် မွန်တစ်ပါတီဖြစ်ရေးကို မကြိုးစားကြဘဲ အတို်က်အခံ NLD-အာဏာရ USDP စသည့်အင်အားကြီးပါတီ ၂ ရပ်ပါဝင်သော၂၀၁၅ ရွေးကောက်ပွဲကို မျက်လုံးစုံမှိတ်ဇွတ်အတင်းဖြစ်ကျော်ဝံ့သော အဆိုပါမွန်ပါတီခေါင်းဆောင်များတို့၏ နိုင်ငံရေးရေချိန်ကိုလည်း ၂၀၁၅ ရွေးကောက်ပွဲ နောင်တပြဒါးတိုင်တစ်ခုအဖြစ် ကျန်ရစ်နေတော့သည်။

    ၁၉၉၀ ရွေးကောက်ပွဲတွင် NLD နှင့်အပြိုင် မွန်ကိုယ်စားလှယ်လောင်း ၁၉ ဦးအနက် ၅ ဦး၊ ၂၀၁၀ ရွေးကောက်ပွဲတွင် USDP နှင့်အပြိုင် မွန်ကိုယ်စားလှလောင်း ၃၅ ဦးအနက် ၁၆ ဦးတို့အနိုင်ရရှိခဲ့ပြီး ၂၀၁၅ ရွေးကောက်ပွဲဝင် မွန်ကိုယ်စားလှယ်လောင်း ၁၀၀ နီးပါးတွင် ၄ ဦးသာ အနိုင်ရရှိခဲ့သည့် ယခုဖြစ်ရပ်ကို ခွက်ခွက်လန်မဲရှုံးတဲ့ပွဲဟု မှတ်တမ်းတင်အပ်ပါသည်။

    ထို့ကြောင့် တစ်ခုတည်းသောမွန်ပါတီ ညီညွတ်သောမွန်အင်အားစုဖြစ်ရေး ဆက်လက်မကြိုးစားဘဲ နောင် ၅ နှစ်ကြာမှတစ်ကြိမ် ထပ်မံကျင်းပမည့်ရွေးကောက်ပွဲကို လက်ရှိပကတိရုပ်အတိုင်း နောက်ထပ်ဝင်ရောက်ဦးမည်ဆိုပါက လွှတ်တော်တွင်းသို့ မွန်တိုင်းရင်းသားအမတ်ရောက်ရှိနိုင်ရေး ဝေးသထက် ဝေးနေပါဦးမည်ဟု လွတ်လပ်သောမွန်သတင်းအေဂျင်စီက အသိပေးအပ်လိုက်ပါကြောင်း။

    ဆက်စပ်သတင်း

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.

    Stay Connected

    0FansLike
    0FollowersFollow
    409FollowersFollow
    20,600SubscribersSubscribe
    spot_img

    Latest posts