မွန်  ၊ အင်္ဂလိပ် ၊  Font

Breaking News
Home / သတင်း / မွန်ပြည်နယ်မှ တိုင်းရင်းဘာသာများဖြင့် မြန်မာ့အလင်းသတင်းစာအချပ်ပို ထုတ်ဝေပြီ

မွန်ပြည်နယ်မှ တိုင်းရင်းဘာသာများဖြင့် မြန်မာ့အလင်းသတင်းစာအချပ်ပို ထုတ်ဝေပြီ

ရေးသားသူ: > ပြန်ကြားရေးဝန်ကြီးဌာန၊ သတင်းနှင့်စာနယ်ဇင်းလုပ်ငန်း မော်လမြိုင်(ကိုယ်ပွား) သတင်းစာတိုက်က မွန်၊ စကောကရင်၊ ပိုးကရင်၊ ပအိုဝ်း တိုင်းရင်းသာဘာသာ ၄ မျိုးဖြင့် ယနေ့(သြဂုတ်လ ၁ )ရက်မှ စတင်ပုံနှိပ်ဖြန့်ချိလိုက်သည်ကို ဖတ်ရှုရသည်။

အဆိုပါ တိုင်းရင်းဘာသာ ၄ မျိုးကို သတင်းစာမျက်နှာတစ်မျက်နှာ ရောင်စုံကာလာဖြင့် ပုံနှိပ်ဖေါ်ပြထားသည်ကို တွေ့ရှိရသည်။

မော်လမြိုင်အခြေစိုက် တစ်လ ၂ ကြိမ်ထုတ်ဝေလျက်ရှိသော စနောင်းတိုင်း(Guiding Star) မွန်သတင်းဂျာနယ် အယ်ဒီတာ နိုင်ပိုင်းနွန်က “ဒီနေ့မှစပြီးထုတ်တာဆိုတော့ ပရိတ်သတ်တွေရဲ့အသံကို မကြားမိသေးဘူး၊ မွန်စာတစ်မျက်နှာပဲဆိုတော့လည်း ဖတ်လို့မဝဘူး၊ ဒီနေ့မှာ မွန်သတင်း ၆ ပုဒ်ပဲပါတယ်” ဟု ပြောသည်။

မွန်ပြည်နယ်တွင် စနောင်းတိုင်းသတင်းဂျာနယ်တစ်စောင် ငွေကျပ် ၅၀ဝ၊ မြန်မာ့အလင်သတင်းစာတစ်စောင် ငွေကျပ် ၁၀ဝ ဖြင့် ဝယ်ယူဖတ်ရှုနေရသည်ဟု သိရသည်။

မြန်မာ့အလင်းသတင်းစာ မွန်ဘာသာအချပ်ပိုအတွက် ဘာသာပြန်ကူညီပေးနေသူ မိမွန်ကျဲက “လာမယ့် သြဂုတ် ၃ ရက်နေ့ကစပြီး အပတ်စဉ်တနင်္ဂနွေနေ့တိုင်း တစ်ပတ်တစ်ကြိမ်ထုတ်ဝေသွားမယ်၊ လောလောဆယ် အချိန်ပြည့်ဝန်ထမ်းတွေတော့ မခန့်နိုင်သေးဘူး” ဆိုသည်။

သက်ဆိုင်ရာ တိုင်းရင်းသားဘာသာအလိုက် စာစီစာရိုက် ၁ ဦး၊ ဘာသာပြန် ၂ ဦး၊ ကြီးကြပ်သူ ၁ ဦးမခန့်အပ်နိုင်မီအချိန်တွင် လုပ်အားပေးဝန်ထမ်းများဖြင့် အကောင်အထည်ဖေါ်သွားမည်ဟု သိရသည်။

အဆိုပါမြန်မာ့အလင်းသတင်းစာ မော်လမြိုင်(ကိုယ်ပွား) သတင်းစာတိုက်မှ မွန်ပြည်နယ်အတွက် စောင်ရေ ၃ သောင်း၊ ကရင်ပြည်နယ်အတွက် စောင်ရေ ၂ သောင်း နေ့စဉ်ဖြန့်ဝေရန် စီစဉ်ထားသည်။

လက်ရှိမော်လမြိုင်မြို့ပေါ်တွင် ပုဂ္ဂိလိကအဖွဲ့အစည်းဖြင့် စနောင်းတိုင်း မွန်သတင်းဂျာနယ်တိုက်က တစ်လ ၂ ကြိမ်၊ သံလွင်တိုင်းမ် သတင်းဂျာနယ် တစ်လ ၂ ကြိမ်(မွန်ဘာသာအချပ်ပို)နှင့် အစိုးရထုတ် မြန်မာ့အလင်းသတင်းစာ အပတ်စဉ်(မွန်ဘာသာအချပ်ပို) ထုတ်ဝေလျက်ရှိသည်။

About မွန်သတင်းအေဂျင်စီ

Check Also

နိုင်လှုံ-လက်တက်ကျေးရွာအုပ်ချုပ်ရေးမှူးကိစ္စတိုင်ကြားသူများအား စတင်စစ်ဆေး

မုဒုံမြို့နယ် နိုင်လှုံ-လက်တက်ကျေးရွာအုပ်စု အုပ်ချုပ်ရေးမှူး ဦးထွန်းသိန်းအား တာဝန်မှ ရပ်နားပေးရန် ပြည်နယ်ဝန်ကြီးချုပ်ထံ လိပ်မူတိုင်ကြားသူများအနက် (၁၀) ဦး ကို မုဒုံမြို့နယ် အထွေထွေအုပ်ချုပ်ရေးဦးစီးဌာနရုံး၌ ဇူလိုင်လ ၂၄ …

Leave a Reply

%d bloggers like this: