မွန်  ၊ အင်္ဂလိပ် ၊  Font

Breaking News
Home / သတင်း / နိုင်ငံရေးတွေ့ဆုံဆွေးနွေးရန်လိုဟု UNA ကြေညာချက်ထုတ်ပြန်

နိုင်ငံရေးတွေ့ဆုံဆွေးနွေးရန်လိုဟု UNA ကြေညာချက်ထုတ်ပြန်

ရေးသားသူ:

လွတ်လပ်သော မွန်သတင်းအေဂျင်စီ – တိုင်းရင်းသားပါတီ ၇ ပါတီ ပါဝင်ဖွဲ့စည်းထားသည့် ညီညွတ်သော တိုင်းရင်းသားလူမျိုးများ မဟာမိတ်အဖွဲ့ UNA မှ နိုင်ငံရေးတွေ့ဆုံဆွေးနွေးရန်လိုဟု ပြီးခဲ့သည့် နိုဝင်ဘာလ ၁၉ ရက်နေ့က ကြေညာချက်တစ်စောင် ထုတ်ပြန်ခဲ့သည်။

UNA ၏ထုတ်ပြန်ချက်(UNA)
UNA ၏ထုတ်ပြန်ချက်(UNA)

SNLD ပါတီ ပြောခွင့်ရ ဦးစိုင်းလိတ်က “အဓိက အချက်နှစ်ချက်ပေါ့နော် နိုင်ငံရေးတွေ့ဆုံဆွေးနွေးဖို့နဲ့ စီးပွားရေးရုပ်သိမ်းတာ စောသေးတယ်ဆိုတဲ့ ဒီနှစ်ခုကို အဓိကထားပြီးတော့ ကျနော်တို့ ဒီထုတ်ပြန်ချက်ကိုထုတ်လိုက်တာပါ” ဟု ပြောသည်။

မြန်မာနိုင်ငံ၏ဒီမိုကရေစီပြုပြင်ပြောင်းလဲရေးလုပ်ငန်းစဉ်အစပြုရုံသာရှိ၍ ပြီးပြည့်စုံရန် မရှိသေးကြောင်း၊ နိုင်ငံရေးအကျဉ်းသားအချို့ ထောင်ထဲကျန်ရှိနေသေးကြောင်းနှင့် မြန်မာပြည်အပေါ် သတ်မှတ်ထားသည့် စီးပွားရေးပိတ်ဆို့မှုအကုန်လုံးနီးပါး ရုပ်သိမ်းခြင်းသည် အချိန်စောလွန်းနေသေးသည်ဟု ၎င်းထုတ်ပြန်ကြေညာချက်တွင် ဖော်ပြထားသည်။

ထို့အပြင် တိုင်းရင်းသားများတောင်းဆိုနေကြသော တန်းတူရေးနှင့် ကိုယ်ပိုင်ပြဌာန်းခွင့်ကို အခြေခံသည့်ဖက်ဒရယ်ပြည်ထောင်စုစနစ်ဖြစ်ပေါ်လာရန် အခင်းအကျင်းချမှတ်ထားခြင်းမရှိ သေးသည့်အတွက် အမေရိကန်အနေဖြင့် စီးပွားရေးပိတ်ဆို့မှု ရုပ်သိမ်းမှုကို အချိန်စောပြီး မပြုလုပ်သင့်ကြောင်း စသည့်အချက် ၄ ချက်တို့ပါဝင်သည်။

အဆိုပါကြေညာချက်ကို ပြီးခဲ့သည့် နိုဝင်ဘာလ ၁၉ ရက်နေ့၌ ရန်ကုန်တက္ကသိုလ် ဘွဲ့နှင်းသဘင်ခန်းမတွင် အမေရိကန်သမ္မတ အိုဘားမားနှင့်တွေ့ဆုံခဲ့စဉ် UNA အဖွဲ့ခေါင်းဆောင် ရှမ်းအမျိုးသားဒီမိုကရေစီအဖွဲ့ချုပ် SNLD ဥက္ကဌ ဦးခွန်ထွန်းဦး ကိုယ်တိုင်ပေးကမ်းလိုက်ခြင်းဖြစ်သည်ဟု SNLD ပါတီမှ ပြောခွင့်ရ ဦးစိုင်းလိတ်က ပြောသည်။

၎င်းက “အမရိကန်သမ္မတ အိုဘားမား စစတွေ့ချင်းမှာ ဥက္ကဌ ဦးခွန်ထွန်းဦးက မြန်မာပြည်ရဲ့ အဓိက လိုအပ်ချက်ကတော့ တိုင်းရင်းသားတွေ ငြိမ်းချမ်းရေးရရှိဖို့ပဲ၊ ငြိမ်းချမ်းရေးရဖို့ဆိုရင် တိုင်းရင်းသားတွေ လိုလားတောင့်တနေတဲ့ အာမခံချက်ရှိတဲ့ ဖက်ဒရယ်ပြည်ထောင်စုစနစ်ကို အကောင် အထည်ဖော်ဖို့လိုတယ်” ဟု ပြောသည်။

ထို့နောက် ပြည်တွင်း ငြိမ်းချမ်းရေးဖော်ဆောင်ရာ၌ တပ်မတော်အကြီးအကဲများသည်လည်း အဓိက တာဝန်ရှိသူများဖြစ်သည့်အတွက် လက်နက်ကိုင် ပဋိပက္ခများ အဆုံးသတ်ရာတွင် ပူးပေါင်း ပါဝင်သွားရန်လိုကြောင်း ပြီးခဲ့သော အောက်တိုဘာလ ၂၈ ရက်နေ့တွင် ညီညွတ်သောတိုင်းရင်းသား မဟာမိတ်အဖွဲ့မှ ကြေညာချက်တစ်စောင် ထုတ်ပြန်ခဲ့ပြီးဖြစ်သည်။

United Nationalities Alliance (UNA) ခေါ် တိုင်းရင်းသားမဟာမိတ်အဖွဲ့ကို ၁၉၉၀ ခုနှစ် ရွေးကောက်ပွဲ နောက်ပိုင်းတွင် ရွေးကောက်ပွဲဝင် တိုင်းရင်းသား နိုင်ငံရေးပါတီ ၁၁ ဖွဲ့ဖြင့် ဖွဲ့စည်းခဲ့သည်။

လက်ရှိ UNA အဖွဲ့တွင် ရှမ်းအမျိုးသားများ ဒီမိုကရေစီအဖွဲ့ချုပ် SNLD၊ မွန်ဒီမိုကရေစီပါတီ MDP ၊ Zomi Congress for Democracy (ZCD)၊ ရခိုင် ဒီမိုကရေစီအဖွဲ့ချုပ် ALD၊ ရှမ်းပြည်ကိုးကန့် ဒီမိုကရက်တစ်ပါတီ SSKDP, Kachin State National Congress for Democracy (KNCD)၊ Kayin National congress for Democracy (KNCD) ပါဝင်လျှက်ရှိကြသည်။

About မွန်သတင်းအေဂျင်စီ

Check Also

ရေးမြို့နယ်တွင် ရာဘာအစေးခြစ်လုပ်သားရှားပါး

ယခုနှစ်မိုးနှောင်းကာလ ရာဘာအစေးခြစ်ရာသီစတင်ချိန်၌ မွန်ပြည်နယ် ရေးမြို့နယ်ဒေသတဝိုက်တွင် လုပ်သားရှားပါးမှုပြဿနာနှင့်ကြုံတွေ့နေရကြောင်း ခြံပိုင်ရှင်များထံမှ သိရသည်။ Related

%d bloggers like this: