spot_img
Thursday, March 28, 2024
More
    spot_img
    Homeသတင်းမွန်ပြည်သစ်ပါတီတပ်တည်ခွင့်နေရာပိုမိုရရှိလာ

    မွန်ပြည်သစ်ပါတီတပ်တည်ခွင့်နေရာပိုမိုရရှိလာ

    -

    ခတ္တာနွန် – မွန်ပြည်နယ်နှင့်ဆက်စပ်ရာနယ်မြေများတွင် ဒေသတည်ငြိမ်းအေးချမ်းရေးနှင့် လုံခြုံရေးအတွက် မြန်မာအစိုးရယခင် ၁၉၉၅ ခုနှစ်အပစ်ရပ်သဘောတူညီချက်ပါ တပ်တည်နေရာများအပြင် နောက်ထပ် ၁၄ နေရာတိုးချဲ့ခွင့်တောင်းဆိုခဲ့သည့်အနက် ၁၀ နေရာကိုသဘောတူညီမှု ရရှိခဲ့ပြီးဖြစ်သည်။

    ယခင်ရှိရင်းစွဲအမြဲတမ်းတပ်တည်ခွင့် ၁၃ နေရာအပြင် ထပ်မံ၍ရေးမြို့နယ်တွင် ၃ နေရာ၊ သံဖြူဇရပ်မြို့နယ်တွင် ၂ နေရာ၊ မုဒုံမြို့နယ်တွင် ၂ နေရာ၊ ကျိုက်မရောမြို့နယ်တွင် ၂ နေရာ၊ ကရင်ပြည်နယ်တွင် ၂ နေရာနှင့် တနင်္သာရီတိုင်းဒေသကြီးတွင် ၃ နေရာဟူ၍ ၁၄ နေရာတောင်းဆိုခဲ့ရာ ကျန် ၄ နေရာအတွက် ဆက်လက်ဆွေးနွေးသွားဦးမည်ဖြစ်ကြောင်း မွန်ပြည်သစ်ပါတီမှ တာဝန်ရှိသူတဦးက ပြောသည်။

     မြန်မာအစိုးရနှင့်မွန်ပြည်သစ်ပါတီ နှစ်ဖက်အပစ်ရပ်သဘောတူညီကြပြီးအမှတ်တရဓါတ်ပုံရိုက်ကူးထားပုံ(Photo-facebook)
    မြန်မာအစိုးရနှင့်မွန်ပြည်သစ်ပါတီ နှစ်ဖက်အပစ်ရပ်သဘောတူညီကြပြီးအမှတ်တရဓါတ်ပုံရိုက်ကူးထားပုံ(Photo-facebook)
    “ဒီ ကျနော်တို့ တင်ထားတဲ့ ၁၄ နေရာအထဲမှာမှာ မွန်ပြည်နယ်မဟုတ်တဲ့နယ်မြေအချို့နဲ့ မော်လမြိုင်-ရေးကားလမ်းအနောက်ခြမ်းဒေသ စုစုပေါင်း ၄ နေရာအတွက်ဆက်ပြီးဆွေးနွေးရဦးမယ်၊ အဲဒီနေရာတွေမှာ အစိုးရစီမံကိန်းတွေလည်းရှိနေတယ်၊ အဲဒါကြောင့် လက်နက်ကိုင်တပ်ဖွဲ့တွေထားမယ့်အစား တပ်ပိုင်းနဲ့မသက်ဆိုင်တဲ့ပါတီရုံးတွေထားဖို့အတွက် ပြောလာပါတယ်” ဟု၎င်းကဆက်ပြောသည်။

    ၄င်းတပ်တည်နေရာသစ်များနှင့် ဆက်ဆံရေးရုံးများအတွက် မွန်ပြည်သစ်ပါတီမှ ယခုလ ၁၅ ရက်နေ့ ဗဟိုကော်မတီပုံမှန်အစည်းအဝေးတွင် ဆက်လက်ဆွေးနွေးသွားမည်ဟု သိရသည်။

    မွန်ပြည်သစ်ပါတီအနေနှင့် ရပ်ရွာအေးချမ်းတည်ငြိမ်ရေးအတွက် ရည်ရွယ်ထားကြောင်း၊ ယခင် ၁၉၉၅-၂၀၁၀ အပစ်ရပ်စဲသည့်ကာလများတွင် မွန်ပြည်သစ်တပ်ဖွဲ့များ ဝင်ရောင်ခွင့်မရှိသောအချို့ဒေသများတွင် ခွဲထွက်အဖွဲ့များနှင့် အခြားလက်နက်ကိုင်အဖွဲ့များ၏ ငွေတောင်းခံမှု၊ သတ်ဖြတ်မှုနှင့် မြန်မာအစိုးရတပ်ဖွဲ့တို့၏ လူ့အခွင့်အရေးချိုးဖောက်မှုများ ဖြစ်ပေါ်ခဲ့သည်။
    အထူးသဖြင့် မွန်ပြည်နယ်နှင့်တနင်္သာရီတိုင်းဒေသကြီးနယ်နိမိတ်စပ်ကြားဒေသများတွင် မွန်ခွဲထွက်အဖွဲ့များလှုပ်ရှားခဲ့သဖြင့် ရေးမြို့နယ်တောင်ပိုင်းနှင့် ရေဖြူမြို့နယ်တဝိုက်၌ နယ်မြေအေးချမ်းမှု ပျက်ပြားခဲ့သည်။

    “ကျနော်တို့တပ်ဖွဲ့တွေ ဝင်ပြီးအခြေချနိုင်မယ်ဆိုရင် ဒေသလုံခြုံရေးအတွက် အထူးတာဝန်တရပ်အနေနဲ့ ယူပေးမယ်၊ ဖွံ့ဖြိုးရေးအစီအစဉ်တွေကိုလည်း စဉ်းစားပေးနိုင်မယ်၊ ကျနော်တို့ မွန်ပြည်သူတွေကလယ်ယာခြံတွေကို အဓိကလုပ်ဆောင်နေတဲ့အတွက် ဒီအလုပ်နဲ့ ပတ်သက်တဲ့ ဖွံ့ဖြိုးရေးတွေရယ်၊ နောက်လမ်းတံတားမရှိသေးတဲ့နေရာတွေကို ဖောက်လုပ်သွားဖို့ကိုလည်း ဆောင်ရွက်နိုင်ပါလိမ့်မယ်” အထက်ပါမွန်ပြည်သစ်ပါတီတာဝန်ရှိသူက ဆက်ပြောသည်။

    မွန်ပြည်သစ်ပါတီ စစ်ရေးအကြံပေး-ဗိုလ်မှူးကြီးဟောင်း နိုင်ကောင်းရွတ်က “ မွန်ပြည်သစ်တပ်ဖွဲ့တွေအနေနဲ့ ပေါက်ပင်ကွင်းတို့ ၊ မန်ကျည်းတို့လိုရွာမျိုးတွေမှာ တပ်တည်ခွင့်ရမယ်ဆိုရင် အနီးအနားတဝိုက်က ခွဲထွက်အဖွဲ့တွေကို ကာကွယ်လို့ရနိုင်မယ်၊ သံဖြူဇရပ်-သုံးဆူလမ်းက ဆီးနှစ်ပင်တို့ ဘက်မှာဆိုရင်လည်း ဓါးမြတွေရဲ့ အန္တရာယ်တွေကို ကာကွယ်ပေးနိုင်လိမ့်မယ်” ပြောသည်။

    အကယ်၍ နိုင်ငံရေးအရဆွေးနွေးပွဲများအောင်မြင်သွားမည်ဆိုလျှင် ယခုတပ်တည်သည့်အခြေအနေများသည် ယာယီအခြေအနေသာဖြစ်နိုင်ကြောင်း၊ ယခုဒုတိယအကြိမ် အပစ်ရပ်စဲရေး သဘောတူညီချက်များသည် ဗိုလ်ချုပ်ခင်ညွန့်လက်ထက်(၁၉၉၅) ခုနှစ်ထက် ပိုမိုကောင်းမွန်ကြောင်း နိုင်ကောင်းရွတ်က သုံးသပ်သည်။
    မွန်ပြည်သစ်ပါတီသည် မွန်ပြည်နယ်အစိုးရအဖွဲ့နှင့်၄င်း၊ မြန်မာအစိုးရပြည်ထောင်စုအဆင့် ငြိမ်ချမ်းရေးဖေါ်ဆောင်မှုအဖွဲ္မ့နှင့်၄င်း ၂၀၁၂ ခုနှစ်၊ ဖေဖေါ်ဝါရီ ၂၅ ရက်နေ့တွင် အပစ်ရပ်လက်မှတ်ရေးထိုးခဲ့ကြပြီး ဖြစ်သည်။

    ဆက်စပ်သတင်း

    Stay Connected

    0FansLike
    0FollowersFollow
    409FollowersFollow
    20,500SubscribersSubscribe
    spot_img

    Latest posts